Dharm Bhagwan Ne Nahin Banaya, Hamari Banayi Aafat Hai

Dharm Bhagwan ne nahin banaya, hamari banayi aafat hai
Karm ki raah par chalo, karm anushasan hai, nishtha hai, mehnat hai

Sach kaha nahin jaata, le lo chaahe saari qasmon ka vaasta
Bin bole jo mehsoos ho jaaye, sach mein itni taaqat hai

Uparwaale ko paison se nahin, aapki bhaavnaaon se hai matlab
Shraddha ho, sabr ho, vishwaas ho to aap par Uski inaayat hai

Dhoondhne se kya milega jo aapke andar hai samaaya
Yahi sabse bada rahasya hai, yahi sansaar ki asliyat hai

Hum Ram ji ko maante hain lekin Ram ji ki maante nahin
Jaan ne ka daawa karte hain magar kuch jaante nahin

Agyaanta ka sahaara liye, andh vishwaason mein pade
Apni sanskriti ka dhindhora peetein, apni baat pe ade

Bhagwaan ko maante lekin insaan ko pehchaante nahin
Hum Ram ji ko maante hain lekin Ram ji ki maante nahin

Sanskriti behti Ganga hai, talaab ka thehra paani nahin
Us badan mein kya jaan, jismein khoon ki ravaani nahin

Tang soch seemit nazariya ho to koi baat thaante nahin
Hum Ram ji ko maante hain lekin Ram ji ki maante nahin





Author: Tapan Ghosh
Film maker, writer, thinker, rolled into one The creative me is a lot of fun. What you see here are my expressions true I hope they strike a chord within you.

Leave a Reply